گورنر پنجاب سردار سلیم حیدر نے اٹک کے قریب پنجاب پولیس کو ایکسپائر شیل فراہم کیے جانے کے معاملے پر شدید تشویش کا اظہار کیا ہے۔ انہوں نے سینئر صحافیوں سے بات کرتے ہوئے کہا کہ پنجاب حکومت اور پولیس کی ناکامی کی وجہ سے پاکستان تحریک انصاف (پی ٹی آئی) کے کارکن اسلام آباد پہنچنے میں کامیاب ہوئے۔ ان کا کہنا تھا کہ صوبے میں کنٹینر لگا کر ایسا تاثر دیا گیا جیسے کوئی بڑی قدرتی آفت یا سونامی آ رہا ہو، جبکہ حقیقت میں یہ حکومتی حکمت عملی کی ناکامی تھی۔
گورنر پنجاب نے مزید کہا کہ پی ٹی آئی کے کارکنوں اور حکومت کی ناکامیوں کا زیادہ تر ذمہ دار پی ٹی آئی کو قرار دیا جا سکتا ہے، تاہم حکومتی ناکامیوں کو بھی نظر انداز نہیں کیا جا سکتا۔ سردار سلیم حیدر نے کٹی پہاڑی اٹک کے قریب پولیس کو ایکسپائر شیل فراہم کرنے کے واقعے کو سنگین قرار دیتے ہوئے کہا کہ یہ پولیس کے لیے خطرہ تھا اور اس سے انتظامیہ کی تیاریوں پر سوالات اٹھتے ہیں۔
انہوں نے وفاقی وزیر علی امین گنڈا پور کے اسلام آباد میں سرکاری وسائل کے ساتھ مظاہرین کو اکسانے کے عمل پر سخت ردعمل ظاہر کیا۔ ان کا کہنا تھا کہ وفاق پر اس طرح حملہ کرنے کی اجازت کسی صورت نہیں دی جا سکتی اور اس کے خلاف فوری کارروائی ضروری ہے۔
گورنر پنجاب نے کہا کہ پی ٹی آئی کے کارکنوں کو اسلام آباد سے نکالنے کے لیے حکومت کی حکمت عملی کامیاب رہی، اور اگر مظاہرین ڈی چوک تک پہنچ جاتے تو اس کا نتیجہ زیادہ تباہ کن ہو سکتا تھا۔ انہوں نے کہا کہ تمام ادارے اس بات میں ناکام ہوئے کہ مظاہرین اسلام آباد تک کیسے پہنچے، تاہم اسلام آباد میں آپریشن کے ذریعے اس صورت حال کو بخوبی سنبھال لیا گیا۔
سردار سلیم حیدر نے مزید کہا کہ بشریٰ بی بی اور علی امین گنڈا پور نے ابتدا میں فرار ہونے کی کوشش کی تھی، لیکن اپنے کارکنوں کے دباؤ کے باعث وہ اسلام آباد سے نہیں جا سکے۔
