پاکستان کے معروف اداکار اعجاز اسلم نے اپنے مداحوں کے ساتھ ایک انتہائی افسوسناک خبر شیئر کی ہے کہ ان کی والدہ کا انتقال ہو گیا ہے۔
اعجاز اسلم نے یہ خبر فوٹو اور ویڈیو شیئرنگ ایپ انسٹاگرام پر ایک پوسٹ کے ذریعے دی، جہاں انہوں نے اپنی والدہ کی ایک یادگار تصویر شیئر کی۔ تصویر میں ان کی والدہ کو اسپتال کے سفید لباس میں دیکھا جا سکتا ہے، جس سے یہ اندازہ ہوتا ہے کہ وہ انتقال سے قبل بیمار تھیں۔
پوسٹ کے کیپشن میں اداکار نے لکھا، “میری پیاری والدہ اس دنیا کو چھوڑ کر ایک بہتر جگہ چلی گئی ہیں۔” انہوں نے مزید کہا کہ والدہ کی محبت، مہربانی اور حکمت ہمیشہ ان کے دل میں زندہ رہے گی اور ان کی جدائی کا دکھ کبھی نہیں بھلایا جا سکے گا۔
اعجاز اسلم نے اپنے چاہنے والوں سے والدہ کے لیے دعاؤں کی درخواست کرتے ہوئے کہا، “میں آپ سب سے گزارش کرتا ہوں کہ انہیں اپنی دعاؤں میں یاد رکھیں۔”
سوشل میڈیا پر اداکار کے مداحوں اور ساتھی فنکاروں نے ان سے تعزیت کا اظہار کیا اور ان کی والدہ کی مغفرت کے لیے دعا کی۔
