اسپیس ایکس کے سربراہ ایلون مسک نے ایک بار پھر مریخ پر انسانوں کو پہنچانے کے اپنے منصوبے کا ذکر کیا ہے۔
انہوں نے ایک پوسٹ میں کہا کہ دو سال کے اندر بغیر کسی انسانی عملے کے پانچ اسٹار شپ مشن مریخ کی جانب روانہ کیے جائیں گے، اور اس کے بعد انسان بردار مشن بھیجے جائیں گے۔
مسک نے وضاحت کی کہ ان بغیر انسانی مشن کی کامیابی اس بات پر منحصر ہے کہ آیا راکٹ مریخ کی سطح پر محفوظ طریقے سے اتریں گے یا نہیں۔ اگر یہ مشن کامیاب رہے تو انسان بردار مشن چار سال میں بھیجے جائیں گے، ورنہ مزید دو سال کی تاخیر ہو سکتی ہے۔
انہوں نے مزید کہا کہ مریخ کا سفر ہر دو سال بعد ہی ممکن ہو گا، جب زمین اور مریخ سورج کے گرد اپنے مدار میں قریب آتے ہیں۔
مسک نے یقین دلایا کہ چاہے لینڈنگ کامیاب ہو یا نہ ہو، اسپیس ایکس ہر دو سال میں مزید اسٹار شپس مریخ کی طرف بھیجے گا، اور ان کا منصوبہ ہے کہ بالآخر ہزاروں اسٹار شپس وہاں پہنچیں گی۔
اسٹار شپ، جو انسانوں کو چاند اور مریخ پر بھیجنے کے لیے اہم ہے، دو حصوں پر مشتمل ہے: ایک سپر ہیوی بوسٹر، جس میں 33 انجن ہیں، اور دوسرا اسٹار شپ اسپیس کرافٹ ہے، جو بوسٹر کے اوپر ہوتا ہے۔
یہ راکٹ 120 میٹر لمبا ہے اور اس کا وزن 50 لاکھ کلوگرام ہے، جسے بار بار استعمال کیا جا سکتا ہے۔
ستمبر 2024 میں، مسک نے کہا کہ اگر ابتدائی مشن کامیاب رہے تو انسانوں کو 2028 میں مریخ پر بھیجا جائے گا۔ یہ مسک کا پرانا خواب ہے، اور دسمبر 2023 میں انہوں نے کہا تھا کہ انسانوں کو زمین سے باہر نکل کر چاند پر بیس اور مریخ پر شہر بنانے چاہئیں۔
اگست 2022 میں ایک مضمون میں، مسک نے اس بات پر زور دیا کہ انسانی تہذیب کو دوسرے سیاروں تک پہنچنے کے قابل ہونا چاہیے، اور اگر زمین رہائش کے قابل نہیں رہی تو ہمیں نئے گھر کی تلاش میں خلائی طیارے سے روانہ ہونا چاہیے۔
