9 مئی کے سانحے میں ملوث 25 مجرموں کو 6 سے 10 سال قید با مشقت کی سزائیں سنا دی گئیں۔ ان افراد کو مختلف حملوں میں ملوث ہونے کے جرم میں سزا دی گئی، جن میں جناح ہاؤس، جی ایچ کیو، پنجاب رجمنٹل سینٹر مردان، پی اے ایف بیس میانوالی، بنوں کینٹ اور چکدرہ قلعہ شامل ہیں۔
انٹر سروسز پبلک ریلیشنز (آئی ایس پی آر) کے مطابق، جناح ہاؤس حملے میں ملوث جان محمد خان اور محمد عمران محبوب کو 10 سال قید با مشقت کی سزا سنائی گئی ہے۔ اسی طرح جی ایچ کیو حملے میں ملوث راجہ محمد احسان کو بھی 10 سال قید با مشقت کی سزا ملی ہے۔ پنجاب رجمنٹل سینٹر مردان حملے میں ملوث رحمت اللہ اور پی اے ایف بیس میانوالی حملے میں ملوث انور خان کو بھی 10 سال قید کی سزا سنائی گئی ہے۔
بنوں کینٹ حملے میں ملوث محمد آفاق خان کو 9 سال قید با مشقت کی سزا جبکہ چکدرہ قلعہ حملے میں ملوث داؤد خان کو 7 سال قید با مشقت کی سزا دی گئی ہے۔
آئی ایس پی آر کے مطابق 9 مئی 2023 کو پاکستان نے سیاسی طور پر اشتعال انگیز تشدد اور جلاؤ گھیراؤ کے افسوسناک واقعات کا سامنا کیا۔ ترجمان پاک فوج کا کہنا ہے کہ یہ واقعات پاکستان کی تاریخ کا ایک سیاہ باب بن چکے ہیں اور ان کی گہرائی سے مذمت کی گئی ہے۔ حکام نے اس بات کا عزم ظاہر کیا ہے کہ ایسے واقعات کے مرتکب افراد کو قانون کے مطابق سخت سزائیں دی جائیں گی تاکہ مستقبل میں اس طرح کے تشدد کا راستہ روکا جا سکے۔
