پاکستانی ڈرامہ انڈسٹری کے ممتاز اور باصلاحیت اداکار عمران اشرف اب بین الاقوامی سطح پر قدم رکھنے جا رہے ہیں۔ وہ جلد بھارتی پنجابی فلم ’’اینا نوں رہنا سہنا نئی آوندا‘‘ میں مرکزی کردار ادا کرتے نظر آئیں گے، جو ان کا بھارتی پنجابی سینما میں پہلا تجربہ ہوگا۔ اس فلم کی عالمی سطح پر ریلیز کی تاریخ 22 اگست 2025 مقرر کی گئی ہے، جس کا اعلان فلم کے پروڈیوسرز نے حال ہی میں کیا۔
فلم کی ہدایت کاری نامور ڈائریکٹر روپن بال نے کی ہے جبکہ اس کی کہانی سریندر اروڑا نے تحریر کی ہے۔ یہ فلم دلجیت دوسانجھ اور ہانیہ عامر کی حالیہ بلاک بسٹر ’’سردار جی 3‘‘ کی کامیابی کے بعد منظر عام پر آ رہی ہے، جس نے سرحد کے دونوں جانب ناظرین کو خوب محظوظ کیا۔
عمران اشرف نے فلم کا آفیشل ٹریلر اپنے انسٹاگرام اکاؤنٹ پر شیئر کیا، جسے شائقین کی جانب سے شاندار پذیرائی حاصل ہوئی۔ ان کے 6.7 ملین فالوورز اس نئے بین الاقوامی آغاز پر بے حد پرجوش نظر آ رہے ہیں۔ سوشل میڈیا پر مداحوں کی جانب سے عمران اشرف کو مبارکباد دینے کا سلسلہ جاری ہے۔
اداکار دانش تیمور نے بھی عمران اشرف کی نئی کامیابی پر خوشی کا اظہار کرتے ہوئے سوشل میڈیا پر پیغام دیا: ’’گڈ لک ہیرو‘‘۔ ایک مداح نے تبصرہ کیا، ’’گڈ لک عمران اشرف! ہانیہ کے بعد اب آپ بھی ہمیں بین الاقوامی سطح پر فخر کا موقع دیں گے۔‘‘ ایک اور صارف نے مزاحیہ انداز میں لکھا، ’’اب تو انڈینز پھر شور مچائیں گے، جیسے سردار جی 3 کے بعد کیا تھا۔‘‘
عمران اشرف کی اس فلم میں شمولیت نہ صرف ان کے کیریئر کے لیے ایک اہم سنگ میل ثابت ہو گی بلکہ اس سے پاکستانی فنکاروں کی عالمی سطح پر بڑھتی ہوئی مقبولیت کا بھی اندازہ لگایا جا سکتا ہے۔ ان کے مداح پُرامید ہیں کہ وہ اپنی شاندار اداکاری سے بھارتی سینما میں بھی دل جیتنے میں کامیاب ہوں گے۔
