وفاقی وزیر اطلاعات عطا اللہ تارڑ نے کہا ہے کہ اسپورٹس جرنلزم نے پاکستان میں کھیلوں کے فروغ میں اہم اور کلیدی کردار ادا کیا ہے، جسے نظرانداز نہیں کیا جا سکتا۔ ان خیالات کا اظہار انہوں نے اسلام آباد میں راولپنڈی-اسلام آباد اسپورٹس جرنلسٹس ایسوسی ایشن کی تقریب حلف برداری سے خطاب کرتے ہوئے کیا۔
عطا اللہ تارڑ نے کہا کہ کھیلوں کی کامیابیوں کو عوام تک پہنچانے میں اسپورٹس جرنلسٹس نے ہمیشہ قابل تعریف خدمات انجام دی ہیں۔ انہوں نے کہا کہ اسپورٹس جرنلسٹس نہ صرف میدان میں اترنے والے نوجوان کھلاڑیوں کے جذبے کو ابھارتے ہیں بلکہ گراس روٹ لیول سے لے کر قومی و بین الاقوامی سطح تک کھیلوں کو اجاگر کرنے میں بھی نمایاں کردار ادا کرتے ہیں۔
وزیر اطلاعات کا کہنا تھا کہ صحافیوں نے اپنی تحریروں، رپورٹنگ اور کیمروں کے ذریعے پاکستان کے اسپورٹس منظرنامے کو دنیا بھر میں مؤثر انداز میں پیش کیا ہے، اور کئی کامیاب اسپورٹس ایونٹس کی مقبولیت دراصل میڈیا کی بدولت ممکن ہوئی۔
عطا اللہ تارڑ نے حکومت کی جانب سے کھیلوں اور اسپورٹس جرنلسٹس کی مکمل معاونت کا اعلان بھی کیا۔ انہوں نے کہا کہ جہاں ضرورت پڑی، حکومت کھیلوں سے وابستہ صحافیوں کے ساتھ کھڑی ہوگی۔ انہوں نے اسپورٹس میڈیا کو ایک مثبت اور تعمیری روایت قرار دیتے ہوئے کہا کہ اس کا فروغ پاکستان میں کھیلوں کی ترقی کا ضامن بن سکتا ہے۔
وزیر اطلاعات نے اس موقع پر نئے منتخب عہدیداروں کو مبارکباد دی اور ان کی خدمات کو سراہا۔
